«Քարֆուրը» գնումների վաուչերներ չի նվիրում․ գրառումը կեղծ է 

Շուշան Ստեփանյան, #CivilNetCheck

Սոցցանցերում տարածվում են գրառումներ «Քարֆուր» սուպերմարկետների անունից՝ հայտարարությամբ, թե ընկերությունը նվիրում է գնումների վաուչերներ նկարում պատկերված թիվը ճիշտ գուշակողներին։

«Այսօր մենք նվիրում ենք կանխիկի և գնումների վաուչերներ նրան, ով գուշակում է նկարի ճիշտ թիվը»,- նշված է գրառման մեջ։

Գրառումը Ֆեյսբուքում հարյուրավոր մեկնաբանություններ և տարածումներ (share) ունի, սակայն այն հերթական խաբեությունն է, որտեղ օգտագործվում է հայտնի ընկերության անունը վստահություն ներշնչելու համար։

Գրառումը տարածող էջը նախկինում կենցաղային տեխնիկա և մեքենա էր խոստանում նվիրել

Գրառումը տարածվում է ????????? ????• անվանումով ֆեյսբուքյան էջով։

Գրառումը մեկնաբանելուց հետո զեղծարարները նվերը ստանալու համար պահանջում են գրանցվել իրենց ուղարկած կայքում, որը վնասակար ծրագրեր է պարունակում։

Ի՞նչ է հայտնի ֆեյսբուքյան էջի մասին

Ֆեյսբուքյան էջում կեղծ խաղարկությունների վերաբերյալ գրառումներից բացի, որևէ այլ բովանդակություն չկա։ Նախկինում նույն էջը գրել էր, թե «Քարֆուրը» խաղարկում է սառնարաններ, մեքենաններ և այլն, ինչը ևս խաբեություն էր։ #CivilNetCheck-ն անդրադարձել է դրան։ 

Հայտնի չէ, թե որտեղից է կառավարվում էջը։ Այնուամենայնիվ, վաուչերների վերաբերյալ գրառման մեկնաբաննություններում առկա է ինդոնեզերեն «@pengikut» նշումը, որը համարժեք է «@everyone» նշմանը և օգտագործվում է բոլոր հետևորդներին գրառման մասին ծանուցելու համար։ 

#CivilNetCheck-ի հետ զրույցում «Քարֆուր» սուպերմարկետների ցանցից հերքել են կապը ֆեյսբուքյան էջի հետ։ Ֆեյսբուքում «Քարֆուրի» պաշտոնական էջն է «Carrefour Armenia»-ն։

Այսպիսով, «Քարֆուր» սուպերմարկետի անունից տարածվող խաղարկության մասին գրառումը կեղծ է և նպատակ ունի մոլորեցնել օգտատերերին՝ փորձելով հավաքագրել անձնական տվյալներ և տարածել վնասակար ծրագրեր։