IDBank-ը հարցմանը մասնակցելու դիմաց գումար չի տալիս

Շուշան Ստեփանյան, #CivilNetCheck

Սոցցանցերում տարածվում են գրառումներ IDBank-ի անունից՝ հայտարարությամբ, թե ընկերությունը հարցմանը մասնակցելու համար գումար է տրամադրում:

«Մասնակցիր հարցմանը և ստացիր 20000 դրամ IDBank-ի կողմից»,- նշված է գրառման մեջ։

Սակայն գրառումը կեղծ է, իսկ դրա իրական նպատակը օգտատերերի անձնական և բանկային տվյալները կորզելն է։

Ո՞ւր է տանում գրառումը 

Հրապարակմանը կցված է saltescapespa.com կայքի հղումը, որն IDBank-ի կայքը նմանակող կեղծ կայք է։ 

Կայքում որոշ հարցերի պատասխանելուց հետո հաճախորդից պահանջվում է մուտքագրել հեռախոսահամարն ու IDBank-ի հավելվածի գաղտնաբառը։

Հարցման դիմաց գումար տրամադրելու խոստումն իրականում օգտագործվում է որպես խայծ՝ հաճախորդի անձնական և բանկային տվյալները կորզելու համար։ 

IDBank-ի պաշտոնական ֆեյսբուքյան էջը IDBank-ն է, իսկ կայքը՝ idbank.am-ը։ 

Առաջին անգամ չէ, որ IDBank-ի անունն օգտագործվում է զեղծարարություն իրականացնելու համար, ինչին #CivilNetCheck-ն արդեն անդրադարձել է։

Նման դեպքերում պետք է ուշադրություն դարձնել կայքի դոմեյնին, ինչպես նաև զգուշանալ անձնական կամ բանկային տվյալներ տրամադրելուց։ Իսկ եթե արդեն տրամադրել եք ձեր տվյալները կամ կասկածներ ունեք, պետք է դիմեք ձեր բանկին պաշտոնական հեռախոսահամարով։