Գազայում հրադադարի համաձայնություն է կայացվել
CivilnetԵրկու տարվա արյունալի պատերազմից հետո Իսրայելն ու ՀԱՄԱՍ խմբավորումը համաձայնել են Գազայում հրադադար հաստատել։ Դա հնարավոր է դարձել Եգիպտոսում ընթացող ծանր բանակցային գործընթացից հետո՝ հոկտեմբերի 8-ի երեկոյան, որում անմիջականորեն ներգրավված էին Եգիպտոսը, Կատարը, Թուրքիան և Միացյալ Նահանգները։
Գործարքն ամբողջացնելու համար նախօրեին Եգիպտոս էին մեկնել ԱՄՆ նախագահի հատուկ բանագնաց Սթիվ Ուիթքոֆֆն ու Դոնալդ Թրամփի փեսա՝ Ջարեդ Քուշները։
Հակամարտող կողմերը պարտավորվել են հրադադար հաստատել Գազայում, ազատել բոլոր գերիներին, ինչպես նաև Իսրայելը պետք է հետ քաշի զորքերն ու թույլատրի հումանիտար մուտքը Գազա։
Իսրայելի վարչապետ Բենիամին Նեթանյահուն թեպետ համաձայնությունը ողջունել է, սակայն պետք է այսօր հայցի իր կառավարության հավանությունը։
ՀԱՄԱՍ-ն իր հերթին կոչ է արել ԱՄՆ-ին ստիպել Իսրայելին հետևել հրադադարի ռեժիմին, իսկ այսօր հայտարարել է դրա խախտման մասին։
ԱՄՆ-ի նախագահ Թրամփը Եգիպտոսում կայացրած համաձայնությունը աննախադեպ նորություն է համարել ամբողջ արաբական աշխարհի համար՝ նշելով որ կողմերը համաձայնել են խաղաղության պլանի առաջին՝ սկզբնական փուլին։
Թրամփն ավելի վաղ 20 կետանոց ծրագիր էր ներկայացրել վերջնական կարգավորման մասին։ Այն ենթադրում է Գազայում ՀԱՄԱՍ-ի զինաթափումը, բոլոր թունելային ենթակառուցվածների վերացումն ու միջազգային վերահսկողությամբ անցումային կառավարության ստեղծումը։ Առաջարկներ, որոնց դժվար թե համաձայնի ՀԱՄԱՍ-ը։
