CivilnetԵրեկ կայացավ Եվրո 2016-ի ընտրական փուլի 9 հանդիպում: C խմբում Իսպանիայի հավաքականը մրցակցի հարկի 1:2 հաշվով տակ սենսացիոն պարտություն կրեց Սլովակիայի ընտրանուց: Ուկրաինացիները հյուրընկալվելիս 2 անպատասխան գնդակ ուղարկեցին Բելառուսի ընտրանու դարպասը, իսկ Մակեդոնիան սեփական հարկի տակ դժվարությամբ առավելության հասավ Լյուքսեմբուրգի նկատմամբ: Երկրորդ տուրից հետո Սլովակիան վաստակած 6 միավորով միանձնյա գլխավորեց C խումբը: Իսպանիան, Ուկրաինան և Մակեդոնիան երեքական միավոր ունեն, Բելառուսն ու Լյուքսեմբուրգը` մեկական:
E խմբում Անգլիան 5:0 հաշվով ջախջախեց Սան Մարինոյին: Լիտվան ու Սլովենիան էլ նվազագույն հաշվով առավելության հասան համապատասխանաբար Էստոնիայի և Շվեյցարիայի նկատմամբ: Այս խմբում թիմերը դասավորվել են հետևյալ հերթականությամբ. Անգլիա` 6 մ., Լիտվա` 6 մ., Էստոնիա` 3 մ., Սլովենիա` 3., Շվեյցարիա` 0 մ., Սան Մարինո` 0 մ. :
G խմբում կայացած 3 խաղից 2-ում գրանցվեց ոչ-ոքի արդյունք` Շվեդիա - Ռուսաստան հանդիպումն ավարտվեց 1:1 հաշվով, իսկ Լիխտենշտեյնն ու Մոնտենեգրոն չկարողացան գրավել միմյանց դարպասները: Ավստրիան հյուրընկալվելիս 2:1 հաշվով պարտության մատնեց Մոլդովային: Երկրորդ տուրից հետո Ռուսաստանը, Մոնտենեգրոն ու Ավստրիան չորսական միավոր ունեն, Շվեդիան` 2, Լիխտենշտեյնը` 1, Մոլդովան դեռևս միավոր չի վաստակել:
Հիշեցնենք, որ այսօր Վազգեն Սարգսյանի անվան «Հանրապետական» մարզադաշտում տեղի կունենա Եվրո-2016-ի ընտրական փուլի Հայաստան-Սերբիա հանդիպումը: Այն կսկսվի ժամը 20:00-ին:
