Civilnet«Եվրո 2016»-ի ընտրական փուլի առաջին խաղում Հայաստանի հավաքականը մրցակցի դաշտում 2:1 հաշվով ցավալի պարտություն կրեց Դանիայի ընտրանուց:
Առաջին խաղակեսում տանտերերի առավելությունն ակնհայտ էր, բայց թիմերից և ոչ մեկը լուրջ վտանգավոր պահեր չունեցան: Ընդմիջումից հետո խաղի պատկերը փոխվեց. հայ ֆուտբոլիստները կտրուկ ավելացրին արագությունն ու 50-րդ րոպեին Հենրիխ Մխիթարյանն առաջ մղեց Հայաստանին:
10 րոպե անց Հենրիխը կարող էր կրկնապատկել հաշիվը. մեր ընտրանու առաջատարը մրցակցի տուգանային հրապարակի մատույցներում խլեց գնդակը, մեկ հպումով ազատվեց պաշտպաններից և միայնակ մնաց դանիացիների դարպասապահ Կասպեր Շմեյխելի առջև, սակայն վերջինս մեծ դժվարությամբ գնդակը հանեց Մխիթարյանի ոտքի վրայից:
Այդուհետ տանտերերը կրկին տիրեցին նախաձեռնությանն ու 65-րդ րոպեին Պիեր Էմիլ-Հոյբյերգը հեռահար հարվածով հավասարեցրեց հաշիվը: 71-րդ րոպեին Բեռնար Շալանդը Հենրիխ Մխիթարյանի փոխարեն խաղադաշտ մտցրեց Մարկոս Պիզելիին (հնարավոր է Հենրիխը վնասվածք էր ստացել Շմեյխելի հետ պայքարում): Մխիթարյանի հեռանալուց հետո մնացած ժամանակահատվածը մեր ֆուտբոլիստները հիմնականում անցկացրին սեփական կիսադաշտում, իսկ դանիացիներն ավելի ու ավելի էին ուժեղացնում ճնշումը: Արդյունքում Թոմաս Կալենբերգը 80-րդ րոպեին խփեց իր թիմի երկրորդ գնդակը և Դանիայի հավաքականը կամային հաղթանակ տարավ:
Հիշեցնենք, որ Հայաստանի ընտրանին խաղում էր հիմնական կազմի կիսապաշտպան Արազ Օզբիլիսի և հարձակման գծի առաջատար Յուրա Մովսիսյանի. նրանք երկուսն էլ վնասվածք ունեն: Հուսանք հաջորդ խաղում Յուրան և Արազն առողջ կլինեն, իսկ Հայաստանի հավաքականն ավելի վստահ խաղ կցուցադրի ու առաջին 3 միավորը կվաստակի:
