Civilnet
2025-ի դատական տարեգրության առանցքում ոչ թե քաղաքական գործիչներն էին, այլ հոգևորականները: Տարվա ընթացքում դատարան մտան ինչպես Բագրատ սրբազանի և նրա աջակիցների, այնպես էլ Միքայել սրբազանի գործերը: Այս վարույթները տարբերվում էին քննության ձեռագրով. օրինակ՝ Միքայել արքեպիսկոպոս Աջապահյանի գործով նիստերն ընթանում էին ամենօրյա ռեժիմով: Նախնական դատալսումները մեկնարկեցին օգոստոսի 7-ին, իսկ հոկտեմբերի 3-ին դատավոր Արմինե Մելիքսեթյանն արդեն հրապարակեց վճիռը, որի ողջ ընթացքում Միքայել սրբազանը գտնվում էր կալանքի տակ:
Զրպարտության հայցեր և պաշտոնյաների վեճեր
Անցնող տարում զրպարտության և վիրավորանքի հայցերի պակաս չկար. մեծահարուստները դատի էին տալիս պաշտոնյաներին, պաշտոնյաները՝ լրագրողներին և հակառակը: Դատական «էստաֆետը» բացեց «Տաշիր գրուպի» սեփականատեր Սամվել Կարապետյանը: Նա տարվա այն գործարարն է, որն ամենաշատ թվով պաշտոնյաների է դատի տվել՝ ընդհանուր առմամբ հայց ներկայացնելով 21 անձի դեմ, այդ թվում՝ Արսեն Թորոսյանի, Հայկ Կոնջորյանի և Նազելի Բաղդասարյանի:
Սամվել Կարապետյանին չի զիջում Ազգային ժողովի նախագահ Ալեն Սիմոնյանը, որը պահպանում է լրատվամիջոցների ու լրագրողների դեմ ամենաշատ հայցեր ներկայացրած պաշտոնյայի կարգավիճակը: Նույն տարում նաև Նիկոլ Փաշինյանը դատական հայց ներկայացրեց «Հրապարակ» օրաթերթի դեմ, իսկ Փաշինյանին իր հերթին դատի տվեց Ռոբերտ Քոչարյանը:
Վրաերթի գործը և ցմահ դատապարտյալի ազատումը
2025-ին հանգուցալուծվեց հղի Սոնա Մնացականյանի մահվան ելքով վրաերթի գործը: Դատարանը վարչապետի ավտոշարասյան ղեկավար Արամ Նավասարդյանին դատապարտեց 1,5 տարվա ազատազրկման: Ուշագրավ է, որ դատարանը չփոխեց մեղադրյալի խափանման միջոցը, և նա շարունակում է մնալ ազատության մեջ ու մեքենա վարել մինչև վճռի օրինական ուժի մեջ մտնելը:
Տարին նշանավորվեց նաև 30-ամյա քրեական պատմության ավարտով. ցմահ դատապարտյալ Մհեր Ենոքյանը պայմանական-վաղաժամկետ ազատ արձակվեց: Ենոքյանը մահապատժի էր դատապարտվել 1996-ին, որը հետագայում փոխարինվել էր ցմահ բանտարկությամբ:
Քաղաքապետերի և զինվորականների դատավճիռները
Վեց տարվա դատական քաշքշուկից հետո հրապարակվեց Մասիսի քաղաքապետ Դավիթ Համբարձումյանի դատավճիռը, որը դատապարտվեց ավելի քան 6 տարվա ազատազրկման 2018-ի դեպքերի առնչությամբ:
2025-ն առանցքային էր նաև Արցախի 44-օրյա պատերազմին առնչվող գործերի համար: Ավարտվեց «ՑՕՐ-ի Դ-20 դիվիզիոնի» գործով ՊԲ նախկին հրամանատար Ջալալ Հարությունյանի և Իշխան Վահանյանի դատավարությունը: Ջալալ Հարությունյանը դատապարտվեց 5,5 տարվա, իսկ Իշխան Վահանյանը՝ 16 տարվա ազատազրկման: Տարվա ընթացքում մեկնարկեց նաև բանակային հակահարվածի ձախողման գործը, որով անցնում է Արթուր Օհանյանը:
Դատավարությունները Բաքվում
2025-ն առանձնացավ նաև Ադրբեջանում հայ գերիների նկատմամբ դատավարություններով: Ավարտական փուլին մոտեցավ Արցախի ռազմաքաղաքական ղեկավարության գործը: Բաքվի դատարանում դատախազը նրանցից հինգի համար պահանջեց ցմահ, մյուսներին՝ 20 տարվա ազատազրկում: Տարբերակումը պայմանավորված էր տարիքային ցենզով. Արցախի ղեկավարներից մի քանիսի տարիքն անցնում էր 65-ը, իսկ ադրբեջանական օրենսդրությամբ նման դեպքերում ցմահ ազատազրկում չի կիրառվում: Արցախի նախկին պետնախարար Ռուբեն Վարդանյանի և Բաքվում պահվող այլ անձանց գործերն առանձին վարույթներով են քննվում:
Տարեգրությունը եզրափակում է Գյումրիի քաղաքապետ Վարդան Ղուկասյանը, որը պաշտոնը ստանձնելուց ամիսներ անց հայտնվեց կաշառքի գործով քրեական վարույթի կենտրոնում:
Դիտեք նաև՝
Պատմություններ
